C’aggi’ ‘a fa’:Io songo fissato p’o presebbio.
Quanno arriva ‘o vinticinche marzo,
a capa mia accummencia a sfrennesià:
‘mmece ‘e pensà a Pasca d’o Signore
l’uocchie mie vedono già Natale
e quanno arriva ‘o mese e nuvembre,
mentre me chiagne tutt’e muorte mie,
e presebbie so’ belle e pronte.
Uno ‘o metto dint’o salone, nato, addò se magna e o cchiù gruosso
pe’ mosta a tutta a ggente.
‘O Bammeniello mio nasce troppo ampressa.

Mo io voglio dicere ‘na cosa:
si m’ammerete ‘o Paraviso,così sia!
Ma avverto a tutta a Corte celestiale
ca all’ate munno, si nun me preparano ‘o presebbio
io ‘mparaviso nun ce trase;
e voglio ‘o voie e l’asinello
chilli originali che a Notte Santa
scarfarono ‘o Criaturo,

‘o Pate e a Mamma,
e zampugnare cu e pucurelle,
Benino che dorme sotto ‘o pagliaro,
‘o monaco ‘mbriacone e a lavannara
e comme sfunno ‘o cielo ‘e Napule
e comme cascata chella ‘e Caserta,
pecché, stise ‘nterra ,cu a faccia ‘ncopp’e mmane,
m’aggia godè a scena pe’ l’eternità.

Bona gente,
si all’ate munno,
sperduta miez’a meliune ‘e sante
‘e vedè ‘o presebbio ve piglia a nustalgia,
liggite ‘nfronte a chiste:
portano ‘o nummero vinticinche
e vanno verso a rotta vinticinche,
l’unica rotta ‘e tutto ‘o Paraviso,
addò l’angiulille sparano a tracchiata
e Sant’Alfonso ‘ntona a “Pasturale”
e tutte e sante,
cu e stelle dint’e mmane
risponneno cantanno:rolia a Ddio...
Mettiteve pure vuie ncammino
e truvarrite ‘o munno d’a felicità.

p. Luigi Pollastro dei frati minimi